Փետրվարի 1-ից Միացյալ Նահանգները կսահմանի 25% մաքսատուրք Կանադայից և Մեքսիկայից և 10% Չինաստանից ներմուծվող ապրանքների համար, ուրբաթ օրը հայտարարել է Սպիտակ տան մամուլի քարտուղար Քերոլայն Լևիթը։ «Նախագահը (Դոնալդ Թրամփը) խոստացել է դա անել, և նա կատարում է իր խոստումը»,- ասել է նա։
Reuters-ը՝ վկայակոչելով իրազեկ աղբյուրներին, հայտնել էր, որ Թրամփը կարող է մաքսատուրքերի սահմանումը հետաձգել մինչև մարտի 1-ը, սակայն Լևիթը նման հաղորդումներն անվանել է «ոչ իրական»:
Ամերիկյան ֆոնդային ինդեքսները ԱՄՆ նախագահի որոշմանն արձագանքել են անկումով։ S&P 500 ինդեքսը հունվարի 31-ին ընկել է 0,5%-ով, Nasdaq composite-ը՝ 0,3%-ով, իսկ Dow Jones Industrial Average-ը՝ 0,8%-ով:
Թրամփը նախկինում հիմնավորել է հարևան երկրների դեմ առևտրային մաքսատուրքերի անհրաժեշտությունը՝ ասելով, որ Մեքսիկան պետք է դադարեցնի այդ երկրից ԱՄՆ եկող անօրինական միգրանտների հոսքը, իսկ Կանադան պետք է դադարեցնի թմրանյութերի, մասնավորապես՝ ֆենտանիլի առևտուրը։
Կանադայի վարչապետ Ջասթին Թրյուդոն ասել է, որ իր երկիրը «ուժեղ, բայց ողջամիտ» պատասխան միջոցներ կձեռնարկի Վաշինգտոնի մաքսատուրքերի դեմ: Միևնույն ժամանակ նա իր համաքաղաքացիներին կոչ արեց պատրաստվել «դժվար ժամանակներին»։ «Ես գիտեմ, որ կանադացիները կարող են անհանգստացած լինել, բայց ուզում եմ, որ նրանք իմանան՝ կառավարությունն իրենց կողքին է»,- ասել է Թրյուդոն։
Կանադան արդեն պատրաստել է 105 միլիարդ դոլար արժողությամբ ամերիկյան ապրանքների ցուցակը, որոնք կենթարկվեն պատասխան մաքսատուրքերի, եթե Թրամփի ծրագրերն իրականացվեն։ Կանադայի արտաքին գործերի նախարար Մելանի Ջոլին ԱՄՆ պետքարտուղար Մարկո Ռուբիոյի հետ բանակցություններից հետո նախազգուշացրել է Օտտավայի կողմից անխուսափելի պատասխան քայլերի մասին։