«2025 թվականի նորաձևությունը կմիավորի յուրահատուկ էսթետիկան, համարձակությունն ու վերադարձը դեպի անհատականություն»․ սա Platon FF ապրանքանիշի հիմնադիր, ոճաբան Էրիկա Չիլինգարյանի մասնագիտական դիտարկումն է նորաձևության սպասվող թրենդերի մասին։
168․am-ի հետ զրույցում Էրիկա Չիլինգարյանը 2025 թվականի նորաձևության մասին փակագծեր է բացել՝ խորհուրդ տալով՝ ինչպես ու ինչ հագնել, ինչպես հարդարվել ոչ միայն տոնական օրերին, այլև ողջ տարվա ընթացքում։
– Որո՞նք են 2025 թվականի նորաձևության հիմնական մոտիվները, թրենդերը․ ինչպե՞ս ու ի՞նչ հագնել։
– 2025 թվականի նորաձևությունը կմիավորի յուրահատուկ էսթետիկան, համարձակությունն ու վերադարձը դեպի անհատականություն։ Հիմնական տենդենցները սրանք են՝
Castlecore և միջնադարյան էսթետիկա. միջնադարյան տարրերով հագուստները, շղթայական վզնոցները, թավշյա զգեստները և շքեղ զարդերը սիրված կլինեն պատմական թեմաներն ու ռոմանտիկան նախընտրողների համար։
Մաքսիմալիզմ և շքեղություն. Ի տարբերություն նախորդ տարիների մինիմալիզմի՝ նորաձևությունը հակվում է դեպի դրամատիկ տարրեր, մեծ ծավալներ, շերտեր և հարուստ աքսեսուարներ: Պոպուլյար կլինեն այնպիսի նյութերը, ինչպիսիք են մետաղական գործվածքները, ծոպերը և քանդակագործական գծանկարները:
Aquamarine թեմա. ստորջրյա ներշնչված տեսքը` ներառյալ գործվածքները, որոնք թեփուկներ են հիշեցնում, փայլուն նյութերը և կապույտի ու փիրուզագույնի վառ երանգները կդառնան ամառային թրենդ:
Դեղին գույն. Նորաձևության մեջ կլինեն դեղինի երանգները՝ փափուկ վանիլից մինչև հարուստ զաֆրան, որոնք ընդգծում են ուրախությունն ու էներգիան։
Վերադարձ անհատականությանը. առաջատար դիզայներները, ինչպիսիք են՝ Prada-ն և Saint Laurent-ը, շեշտում են ինքնարտահայտման կարևորությունը։ Հավաքածուի յուրաքանչյուր տարր ընդգծում է ոճի յուրահատկությունն ու հեռացումը նորաձևության «ալգորիթմական» միավորումից։
Ֆունկցիոնալության բարձրացում. Պոպուլյար է դառնում էլեգանտ հակումով սպորտային հագուստը, օրինակ, հարմարավետ տաբատներն ու պոլոները՝ յուրահատուկ գծերով և փափուկ գործվածքներով, որոնք կմիավորեն հարմարավետությունն ու ոճը:
Եթե դուք հարցնում եք՝ ինչպե՞ս հագնվել, ապա իմ պատասխանն է՝ հագնվեք այնպես, որ ձեզ հարմարավետ և ինքնավստահ զգաք: Հարմարավետությունն ու ինքնաբավությունը հիմքն են։ Թրենդերին հետևելը, իհարկե, հետաքրքիր է, բայց միևնույն ժամանակ կարևոր է պահպանել ձեր անհատականությունը, չկորցնել ձեզ՝ նորաձևությանը հետևելու ձգտման մեջ։ Յուրաքանչյուր ոճ կարելի է հարմարեցնել ձեր նախասիրություններին՝ ընդգծելով ձեր յուրահատկությունը:
– Ինչպե՞ս հարդարվել 2025 թվականին․ այս հարցն այսօր դարձյալ նորաձևությանը հետևողների թոփում է։
– Սա, թերևս, իմ ամենասիրած թեմաներից մեկն է: Դիմահարդարումը պետք է լինի նուրբ՝ ընդգծելով բնական գեղեցկությունը, չթաքցնելով այն։ Հիմնական սկզբունքը թեթևության զգացում ստեղծելն է, որպեսզի չնկատվի, որ մաշկի վրա կոսմետիկայի բազմաթիվ շերտեր կան։ Ծանր դիմահարդարումը հաճախ ոչ միայն անբնական է թվում, այլև ցուցադրում է ոճի զգացողության կորուստը: Ավելին՝ ավելորդ դիմահարդարումը կարող է ընկալվել որպես դիմահարդարման շերտերի հետևում սեփական անհատականությունը թաքցնելու փորձ։ Իսկական գեղեցկությունը վստահության, ճաշակի և ինքնարտահայտման ներդաշնակությունն է։
– Այսօր նորաձևության մեջ ո՞ր շեշտադրումներն են կարևոր։
– Մեր օրերում նորաձևության մեջ շեշտը դրվում է բնական գեղեցկության վրա է՝ առողջ, ձիգ կազմվածք և խնամված դեմք՝ առանց ավելորդ դիմահարդարման։ Կարևորը ձեր բնական անհատականությունն ընդգծելն է և ոչ թե այն կոսմետիկայի շերտերի տակ թաքցնելը։
Այնպես որ, սիրելի հայուհիներ, եղեք ավելի պարզ․ մի՛ գնացեք թրենդների հետևից, մի՛ թաքցրեք ձեր գեղեցկությունը դիմահարդարման ծանրության հետևում։ Իսկական ոճը բնականության և ինքնավստահության ներդաշնակություն է։