ՄԱԿ-ում Իրանի մշտական ներկայացուցիչ Ամիր Սաիդ Իրավանին կոչ է արել Անվտանգության խորհրդին դատապարտել ԱՄՆ նախագահ Դոնալդ Թրամփի սպառնալիքները Թեհրանի հասցեին` որպես միջազգային իրավունքի խախտում:
«Միացյալ Նահանգների նախագահը, 2025 թվականի հունվարին՝ պաշտոնը ստանձնելուց ի վեր, համակարգված կերպով անտեսել և խախտել է միջազգային նորմերը և սկզբունքները, որոնց վրա հիմնվել է ՄԱԿ-ը։
Անկախ պետությունների դեմ ուժ կիրառելու նրա մշտական սպառնալիքները վտանգավոր նախադեպ են ստեղծում միջազգային հարաբերություններում:
Մտահոգիչ է այն փաստը, որ Միացյալ Նահանգները, որպես ՄԱԿ-ի Անվտանգության խորհրդի մշտական անդամ, բացահայտորեն անտեսում է ՄԱԿ-ի կանոնադրությամբ ստանձնած պարտավորությունները՝ օգտագործելով ռազմական ուժը որպես հարկադրանքի գործիք՝ հասնելու քաղաքական և աշխարհաքաղաքական նպատակներին»,-ասվում է դիվանագետի՝ ՄԱԿ-ի Անվտանգության խորհրդին ուղարկված նամակում։
Այս լուրջ խախտումների լույսի ներքո Իրանի Իսլամական Հանրապետությունը ՄԱԿ-ի Անվտանգության խորհրդին կոչ է արել կատարել միջազգային խաղաղությունն ու անվտանգությունը պահպանելու իր պարտականությունը, միանշանակ, դատապարտել ԱՄՆ նախագահի սպառնալիքները՝ որպես միջազգային իրավունքի և ՄԱԿ-ի կանոնադրության խախտում և ԱՄՆ-ից պահանջել կատարել իր միջազգային իրավական պարտավորությունները: