2-րդ դասարանի «Մայրենի» դասագրքի 48-րդ էջում «ասաց» բառը գրված է ուղղագրական սխալով՝ «ասած» ձևով։
Oragir.News ահազանգած ծնողները հայտնում են, որ իրենց երեխաների մոտ նոր է ձևավորվում գիտելիքների պաշարը, և հատկապես այդ տարիքում սովորած յուրաքանչյուր բառն ու արտահայտությունը հեշտ են տպավորվում երեխաների մեջ։ Նրանց խոսքով՝ նման սխալների հետևանքները կարող են անդառնալի լինել, քանի որ արդեն սխալ ձևով սովորած բառը հետագայում դժվար է շտկել երեխայի գիտակցությունից։
Oragir.News-ը հաստատեց կապ գրքի հեղինակ Վաչագան Սարգսյանի հետ՝ պարզելու, թե ինչպես է նման կոպիտ սխալ թույլ տրվել։
Սարգսյանը նշեց, որ ինքը դեռ չէր նկատել սխալը և ընդունեց, որ նման վրիպակն անթույլատրելի է․
«Վրիպակ է, այն չի նկատվել, ցավալի է։ 2-րդ դասարանի գրքում վրիպակն անթույլատրելի է, բայց արդեն իրական փաստ է։ Այս պահին չեմ կարող ոչինչ անել, ցավոք։ Առաջին անգամ լսեցի, որ նման բան կա»,- նշեց նա։