Հնդկաստանի հարավային Անդհրա Պրադեշ նահանգում վաղ առավոտյան տեղի ունեցած հրմշտոցի հետևանքով զոհվել է առնվազն 9 մարդ, տասնյակ մարդիկ տարբեր աստիճանի վնասվածքներ են ստացել։
Դեպքը տեղի է ունեցել Սրիկակուլամ շրջանի Սրի Վենկատեսվարա Սվամի տաճարում՝ Էկադաշիի առիթով կազմակերպված մեծ ուխտի ժամանակ։
Պաշտոնյաների տեղեկացմամբ՝ 2000 ուխտավորի համար նախատեսված տաճարում այդ օրը հավաքել էր շուրջ 25 հազար մարդ։
Հավատացյալները փորձել են միաժամանակ մտնել տաճարի տարածք՝ մասնակցելու աղոթքի և զոհաբերության արարողությանը, ինչն էլ հանգեցրել է հրմշտոցի։
Անդհրա Պրադեշի փոխնախարար Պավան Կալյանը հայտարարել է, որ միջադեպի կապակցությամբ կսկսվի մանրամասն հետաքննություն։
«Սա մեծագույն ողբերգություն է մեր համայնքի համար։ Մենք կհետաքննենք, թե ինչպես է թույլատրվել նման մեծաթիվ ուխտավորների մուտքը փոքր տարածք», – ասել է Կալյանը։
Նահանգի ներքին գործերի նախարար Անամ Ռամանարայանա Ռեդդին հայտնել է, որ շրջանային իշխանությունները և փրկարար ծառայությունները գործի են անցել անմիջապես միջադեպից հետո։ Վիրավորներից երկուսը ծանր վիճակում տեղափոխվել են հիվանդանոց, իսկ մնացածներին առաջին բուժօգնություն է ցուցաբերվել տեղում։
Հնդկաստանի վարչապետ Նարենդրա Մոդին ցավակցություն է հայտնել զոհվածների ընտանիքներին և հայտարարել պետական փոխհատուցման մասին։
Տեղական լրատվամիջոցների հաղորդմամբ՝ սա Հնդկաստանում վերջին տարիներին տեղի ունեցած ամենամեծ հրմշտոցներից մեկն է, որն ընդգծում է մեծ տաճարներում անվտանգության և մարդաշատ միջոցառումների կազմակերպման խնդիրները։