Մենք ունենք խոստովանության գաղտնիության ինստիտուտ, իրավաբանության մեջ գոյություն ունի անձնական կյանքի իրավունքի գաղտնիության ինստիտուտ։ Ինձ համար բացարձակ անհասկանալի է մարդկանց խոսույթը, որ հոգևորականն իրավունք չունի անձնական կյանքի, դա տարրական անգրագիտություն է, լրագրողների հետ հանդիպմանն ասաց Արշակ Սրբազանը՝ պատասխանելով հոգևորականի՝ անձնական կյանք ունենալու վերաբերյալ հարցին։
«Անձնական կյանքի իրավունք ունեն բոլորը։ Մենք ինչի՞ համար ենք խոստովանության գաղտնիություն ապահովում. նույնիսկ օրենքում կա, որ հոգևորականն ազատված է խոստովանության միջոցով իրեն հայտնի դարձած տեղեկատվության տարածումից։ Պատկերացնո՞ւմ եք, ստեղծվի մի իրավիճակ, երբ մարդն ստիպված լինի իր ունեցած ինտիմ հարաբերությունների վերաբերյալ պարզաբանումներ տալ և սկսի տալ անուններ, որոնց հետ ունեցել է այդպիսի հարաբերություններ։ Պատկերացնո՞ւմ եք՝ ինչպիսի իրավիճակներ կստեղծվեն։ Հարցերի շարջանակ կա, որն անձեռնմխելի է։ Հիմա թե ով ինչպիսի հարաբերություններով է ապրել, չենք կարող գնահատականներ տալ»,-ասաց Սրբազանը։
Նա ասաց, թե անդրորովայնային հետաքրքրություններով առաջնորդվող մեր իշխանությունների թեթև ձեռքով ինտիմ կյանքը դարձել է պետական քաղաքականության առաջնահերթություններից մեկը։
«Մենք ոչ թե պետք է սպասարկենք այդպիսի արհեստական օրակարգերը, այլ առողջ բանավեճ հարուցենք, հակադրենք դրան»,- հավելեց Սրբազանը։