Ինչպես հայտնի է, անցած շաբաթվա սկզբին, Անդրեյ Երմակը դեռևս գլխավորում էր Ուկրաինայի պատվիրակությունը Ժնևում հակամարտությանը վերջ դնելու բանակցություններում:
Դիտորդների կարծիքով, Զելենսկին դիտմամբ էր նրաննշանակել պատվիրակության ղեկավար, որպեսզի ցույց տա, որ կոռուպցիոն սկանդալի պատճառով, մտադիր չէ զոհաբերել իր ամենամոտ ընկերոջը:
Սակայն, Զելենսկունման որոշումը խիստ նյարդայնացրել էր ամերիկացիներին: Վերջիններս ուղակի պահանջել էին Ուկրաինայի ղեկավարից՝հեռացնել Երմակին պաշտոնից, համարելով նրան ռուս-ուկրաինական հաշտեցման գլխավոր հակառակորդ: Իսկ որպեսզի Զելենսկին «ճիշտ» հասկանա ամերիկացիների մեսիջը, նախօրեին, Ուկրաինայի մասնագիտացված հակակոռուպցիոն բյուրոն խուզարկություն անցկացրեց Երմակի Կիևի բնակարանում։ Հայտնի է, որ բյուրոյի գաղտնալսումների մեջ կա նաև Երմակի ածական անունը: Եվ ահա, անցած ուրբաթ օրը Վլադիմիր Զելենսկին նրան ստիպված ազատեց նախագահի աշխատակազմի ղեկավարի պաշտոնից:
Ամերիկացիներից վիրավորված Երմակը, իր հրաժարականի օրը հետևյալ հայտարարությամբ հանդես եկավ.«Ես գնում եմ ռազմաճակատ և պատրաստ եմ ցանկացած ճնշմանը, քանի որ ես ազնիվ և պարկեշտ մարդ եմ»:
Հատկանշանական էր, որ Երմակը իր այս հայտարարությունը ներկայացրել էր Թրամփի կողմնակից «The New York Post» ամերիկյան պարբերականին, ավելացնելով նաև հետևյալը.«Ինձ զրպարտել են և վիրավորել են իմ արժանապատվությունը, չնայած ես Կիևում եմ 2022 թվականի փետրվարի 24-ից: Հետևաբար, ես չեմ ուզում խնդիրներ ստեղծել Զելենսկու համար»։
Վերջում նա նշեց.«Ես զզվում եմ այն կեղտից, որով նրանք փորձում են ինձ պղծել, բայց ես ավելի զզվում եմ ճշմարտությունը իմացողների աջակցության բացակայությունից»:
Երմակի այս հայտարարությունն նման էր մի մարդու խոսքի, ով գիտեր, որ իրեն զոհաբերում են կոնկրետ նպատակով, նաև կար վախ, որ միայն այդ քայլով չեն սահմանափակվի:
Շաբաթ օրը Զելենսկին պատվիրակության նոր ղեկավար նշանակեց Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովին։ Թե ինչու նրան, նույնպես հայտնի է: Դա ամերիկացիների պահանջն էր: Իսկ թե ինու էին ամերիկացիներն ուզում տեսնել հենց Ումերովին այդ պաշտոնում, կվերլուծենք մեր հաջորդ հոդվածում:
Գրեթե բոլոր միջազգային դիտորդների կարծիքով, Երմակի հեռացումով, Զելենսկին կդառնա «կաղ բադ» նույնիսկ իր շրջապատում:
Սակայն, ըստ դիտորդների, հենց դա էլ ցանկանում են ամերիկացիները, որպեսզի կարողանան ստիպել Զելենսկուն համաձայնվել իրենց առաջարկների հետ, լուծել ռուս-ուկրաինական խնդիրը:
Հիշեցնենք, որ որպես նախագահի խորհրդական՝ Երմակը կենտրոնացած էր Ուկրաինայի արտաքին քաղաքականության վրա։ Նա մասնակցել է Նորմանդական ձևաչափի վերակենդանացման ջանքերին, որը ներառում էր Գերմանիան, Ֆրանսիան, Ուկրաինան և Ռուսաստանը։ Հետագայում նրա ոչ պաշտոնական պարտականությունները ընդլայնվեցին՝ ներառելով նաև ներքին քաղաքականության հարցերը։
2022-ին, ռուս-ուկրաինական պատերազմի մեկնարկից հետո Երմակը գնալով ավելի ու ավելի առաջատար դեր ստանձնեց բանակցություններում։ Նա մասնակցեց խաղաղության գործընթացի շրջանակներում գրեթե բոլոր հանդիպումներին, հանդիպեց գործընկեր երկրների ներկայացուցիչների հետ Կիևում և մասնակցում էր գրեթե բոլոր արտասահմանյան այցերին։
2025 թվականի փետրվարին նա Միացյալ Նահանգներում էր, երբ Սպիտակ Տան օվալաձև աշխատասենյակում վեճ բռնկվեց Զելենսկու, նախագահ Թրամփի և փոխնախագահ Ջ.Դ. Վենսի միջև։
Ըստ բրիտանական TheTimes պարբերականի, Զելենսկին զոհաբերելով Երմակին, փորձում է լուծել իշխանությունից արդեն իր անվտանգ հեռանալու խնդիրը: Քանի որ այս հարցում կուլիսային համաձայնությունը Թրամփի և Պուտինի միջև փաստացի կայացել է:
Սա է իրականությունը:
Արտակ Հակոբյան
Zham.am