[ad_1]
ՀՅԴ Բիւրոյի Հայ դատի Կեդրոնական գրասենեակը կը հաղորդէ, որ Քանատայի Հայ դատի յանձնախումբի եւ Քանատայի արտաքին գործոց նախարար Մելանի Ժոլիի պաշտօնական հաղորդակցութիւններուն հիմամբ Հայ դատի յանձնախումբը ստացած է Ժոլիի գրութիւնը, ուր վերջինս առանցքային նշանակութեան շեշտադրումներ կատարած է արցախահայութեան իրաւունքներու պաշտպանութեան եւ Հայաստանի Հանրապետութեան անվտանգութեան խնդիրներու վերաբերեալ:
Մասնաւորաբար, Պաքուի մէջ հայ պատերազմական գերիներու եւ Արցախի նախկին ղեկավարներու շարունակուող կեղծ դատավարութիւններուն լոյսին տակ, նախարար Ժոլի խստօրէն կը դատապարտէ Ազրպէյճանի յարձակողապաշտ հռետորաբանութիւնը եւ կը պահանջէ`
– Ազրպէյճանի մէջ պահուող բոլոր հայ պատերազմական գերիներու եւ կամայականօրէն կալանաւորուած հայերու անվերապահ ազատ արձակում,
– Հայաստանի գերիշխանութեան եւ տարածքային ամբողջականութեան նկատմամբ յարգանք,
– Հայ խաղաղ բնակիչներու անվտանգ եւ արժանապատիւ վերադարձը իրենց հայրենի հողեր,
– Հայկական մշակութային ժառանգութեան պաշտպանութիւն,
– Արցախի հիմնախնդիրի լուծումը ԵԱՀԿ-ի Մինսքի խմբակի հոլովոյթին միջոցով` Հելսինքեան եզրափակիչ հռչակագիրի սկզբունքներուն եւ Հարաւային Կովկասի մէջ արդար ու կայուն խաղաղութեան անհրաժեշտութեան համահունչ` ուժի եւ անոր սպառնալիքի կիրարկման բացառման, տարածքային ամբողջականութեան եւ ինքնորոշման իրաւունքի ծիրին մէջ:
Նախարար Ժոլիի այս դիրքորոշումը կը համապատասխանէ Քանատայի Հայ դատի յանձնախումբի քաղաքական առաջնահերթութիւններուն: Յանձնախումբը իր կողմէ ճշդուած քաղաքական առաջնահերթութիւններու ծիրին մէջ կը շարունակէ աշխատանքը Քանատայի թէ՛ գործադիր, թէ՛ ալ օրէնսդիր իշխանութեան ներկայացուցիչներուն հետ: