Զանգեզուրի պղնձամոլիբդենային կոմբինատում երեկվանից գործադուլ է: Հայաստանի ամենախոշոր հարկատուի աշխատողները պահանջում են աշխատավարձերի բարձրացում:
Զանգեզուրի պղնձամոլիբենային կոմբինատը հայտարարություն է տարածել՝ պնդելով, որ վերոնշյալ գործողությունները գործադուլ չի համարում և չի աջակցում դրանց՝ համարելով ոչ իրավաչափ։
Ընկերությունը նշել է, որ մի խումբ աշխատակիցներ պահանջում են «աշխատավարձի անիրատեսական բարձրացում, ինչը սաբոտաժի է ենթարկել Ընկերությունում աշխատանքային գործընթացը»:
«Աշխատակիցների անօրինական գործողությունների պատճառով Ընկերության արտադրական ցիկլը խաթարվել է, Ընկերությունը և մնացած աշխատակիցները կրում են զգալի նյութական վնաս։Եթե վերոնշյալ անօրինական գործողությունները շարունակվեն, Ընկերությունը ստիպված կլինի իր աշխատակիցների զգալի թվին ուղարկել հարկադիր պարապուրդի», – նշված է հայտարարությունում:
«Ելնելով «ԶՊՄԿ» ՓԲԸ և Ընկերության աշխատակիցների ճնշող մեծամասնության շահերից, Ընկերությունը կիրացնի աշխատանքային պարտավորությունները խախտողներին կարգապահական պատասխանատվության ենթարկելու իր իրավունքները՝ համաձայն ՀՀ աշխատանքային օրենսգրքի 21-րդ գլխի», – նաև նշված է հաղորդագրությունում:
Ակցիայի մասնակիցներից մեկը պնդեց, որ դեռ պատրաստվում են շարունակել գործադուլը՝ չնայած ԶՊՄԿ-ի հայտարարությանը: