Սիրիայում քաղաքացիական պատերազմի բռնկումից հետո Փարիզը խզել էր հարաբերությունները նախագահ Բաշար ալ-Ասադի հետ՝ նրան մեղադրելով մարդու իրավունքների զանգվածային ոտնահարման մեջ։
Ֆրանսիացի չորս դիվանագետի վաղը Սիրիա նախատեսված այցի մասին հայտարարել է Ֆրանսիայի արտգործնախարար Ժան-Նոել Բարոն։ Նախարարի խոսքով՝ պատվիրակությանը հանձնարարված է «նախնական կապեր հաստատել» Սիրիայի նոր իշխանությունների հետ, ինչպես նաև գնահատել բնակչության հրատապ հումանիտար կարիքները։
«Մենք միամիտ չենք Դամասկոսի նոր իշխանությունների նկատմամբ, գիտենք իսլամիստական խմբավորումների անցյալի մասին», – անցած օրերին հայտարարել էր ֆրանսիական դիվանագիտության ղեկավարը՝ շեշտելով, որ Սիրիայի նոր կառավարությունը պետք է ներկայացնի երկրի ողջ բնակչությանը և անցումային շրջանը պետք է ի վերջո ավարտվի ազատ ընտրություններով:
Ֆրանսիայի արտգործնախարարի խոսքով՝ միջազգային հանրությունը կբարելավի հարաբերությունները ժամանակավոր պաշտոնյաների հետ, եթե վերջիններս հարգեն մարդու իրավունքները, ներառյալ փոքրամասնություններին և կանանց, ինչպես նաև շարունակեն պայքարը ահաբեկչության, մասնավորապես՝ «Իսլամական պետություն» խմբավորման դեմ։
