Իսրայելի վարչապետ Բենիամին Նեթանյահուն, ով դեկտեմբերի 29-ին շագանակագեղձի հեռացման վիրահատության էր ենթարկվել, լքել է հիվանդանոցը՝ Քնեսեթում (խորհրդարան) կարևոր քվեարկության համար։ Այս մասին հայտնում է The Jerusalem Post թերթը։
Դրա տեղեկություններով՝ կառավարության ղեկավարը որոշել է մասնակցել պետական բյուջեի, այսպես կոչված, սառեցված շահույթների մասին օրենքի քվեարկությանը։
Ավելի վաղ իշխող կոալիցիայում լուրջ տարաձայնություններ էին ծագել այս քվեարկության շուրջ՝ ծայրահեղ ուղղափառ կուսակցությունների մի շարք պատգամավորներ հրաժարվել էին աջակցել փաստաթղթին՝ պահանջելով նախ ապահովել կրոնական դպրոցների աշակերտների զինվորական ծառայությունից ազատումը։
Այս պահանջը պաշտպանեց նաև ծայրահեղ աջակողմյան «Օտզմա Յեհուդիտ» (Հրեական իշխանություն) կուսակցությունը, որը գլխավորում էր ազգային անվտանգության նախարար Իտամար Բեն-Գվիրը, ով նախկինում բացահայտորեն հայտարարել էր կոալիցիայի աշխատանքը սաբոտաժի ենթարկելու իր մտադրության մասին և այս անգամ պաշտոնապես պահանջել էր ավելացնել իր ենթակայության տակ գտնվող ոստիկանների աշխատավարձերը։
Այս պայմաններում հերթական անգամ փլուզման եզրին գտնվող իշխող կոալիցիան մնաց առանց ձայների անհրաժեշտ մեծամասնության, և Նեթանյահուն վերջին պահին որոշեց անձամբ գալ Քնեսեթ՝ ձայնը ավելացնելու։