Բենգալյան կայծերը, հրավառությունները, լույսերով շղթաները ու շամպայնի խցանները կարող են առաջացնել աչքի ծանր վնասվածքներ, այդ թվում՝ տեսողության կորուստ: Այս մասին ՏԱՍՍ-ին հայտնել է ակնաբույժ և բժշկական գիտությունների թեկնածու Ելենա Կազանցևան։
«Կայծերը կարող են հասնել մինչև 1000 աստիճանի ջերմաստիճանի: Նույնիսկ փոքրիկ, տաք մասնիկը կարող է լուրջ այրվածք առաջացնել, եթե այն ընկնի աչքի մեջ: Կայծերի հետևանքով առաջացած եղջերաթաղանթի այրումը երկարատև բուժում է պահանջում: Երբեմն նման վնասվածքները բարդանում են վարակի պատճառով, ինչն էլ ավելի երկար ու տհաճ է դարձնում ապաքինման գործընթացը»,- ասել է նա։
Ակնաբույժ խոսքով, հրավառությունը նույնպես վտանգ է ներկայացնում. տոնական բոլոր պատահարների մոտ 20%-ը կապված է դրանց օգտագործման հետ։ Դրանք կարող են փոխել թռիչքի ուղին ոչ պատշաճ տեղադրման պատճառով, հարվածել մարդու դեմքին կամ նույնիսկ վաղաժամ պայթել:
«Նման դեպքերը կարող են հանգեցնել եղջերաթաղանթի և կոպերի այրվածքների, ակնագնդի պատռվածքի և նույնիսկ տեսողության ամբողջական կորստի, որոշ դեպքերում շտապ վիրահատություն է պահանջվում»,- պարզաբանել է մասնագետը։
Շամպայնի խցանը, որը դուրս է թռչում 40 կմ/ժ արագությամբ, նույնպես կարող է վնասվածք պատճառել։ Նման խցանով աչքի վնասվածքը կարող է առաջացնել արյունազեղում, եղջերաթաղանթի պատռվածք, ոսպնյակի վնասվածք կամ նույնիսկ ցանցաթաղանթի անջատում։
Բացի այդ, ինչպես նշել է Կազանցևան, լույսերի անսարքությունները կարող են առաջացնել կարճ միացումներ, կայծեր կամ նույնիսկ հրդեհներ, իսկ լազերները կարող են վնասել ցանցաթաղանթը, եթե ուղղված լինեն դեմքին:
«Վատ մեկուսացումով էժանագին լույսերով շղթաները հատկապես վտանգավոր են: Գերտաքացման հետևանքով առաջացող կայծերը կարող են հայտնվել աչքերի մեջ՝ առաջացնելով այրվածք»,- ընդգծել է ակնաբույժը։