Հրաշագործի՛ր հացնուգինով – տեր կենդանիով

01.03.2025 | 11:20

Բարի գալուստ, Գարնան առաջին այգաբաց,

խաղաղություն և առատություն բեր Հայոց աշխարհին,

ծաղկեցրու, պտղավորիր սրբազան հողն Ավետյաց Երկրի,

խելառ ջրերիդ առնական համբույրները թող օրհնյալ լինեն,

արևով ու լույսով ջերմացրու ամեն հունդ, որ պայթեն, տարածվեն ու աճեն, բազմանա՜ն …

Հավատքով զինիր սերմնացաններին. երբեք չընկրկեն եղանակների

ու բազում այլ հանգամանքների որևէ պատճառով:

Համբերությամբ զինիր հավատավորներին

և անուշացրու մեր աչքերում

ու ռունգերում մեր գեղեցիկներին, որպեսզի այլ ափերի կանչերը մարեն մեր մեջ

ու լիանանք քարից քամած ՀԱՑՆՈՒԳԻՆՈՎ – ՏԵՐ ԿԵՆԴԱՆԻՈՎ :

Եվ սեր սփռիր ամենուր…

թող բոլոր կոշտացած սրտերը նույնպես վայելեն վերերկրային շնորհաստեղծ այդ զգացումը:

Եվ բացիր ջերմեռանդ սիրով

Հայոց աշխարհի հորիզոնները….

Հրաշագործի՛ր,

ՄԵԾԴ ԴԻՑԱՄԱՅՐ ԳԱՐՈՒՆ,

հրաշագործի՜ր….

01.03.2014 թվ., Աստուրան

Աշոտ ՄԻՐԶՈՅԱՆ

Մեկնաբանություններ