Իրանի արտաքին գործոց նախարար Ապպաս Արաղչի յայտնեց. «Ամերիկայի հետ անուղղակի բանակցութիւններուն փուլը տեղի պիտի ունենայ 3 մայիսին Իտալիոյ մայրաքաղաք Հռոմի մէջ` Օմանի մէջ յայտարարածիս հիմամբ»:
«Ուրբաթ, 2 մայիսին եւրոպական եռեակին հետ ժողով մը պիտի գումարենք», ըսաւ Արաղչի` ակնարկելով Բրիտանիոյ, Ֆրանսայի եւ Գերմանիոյ:
«Բանակցութիւններու ընթացքին ամերիկեան նոր պատժամիջոցներու հաստատումը ժխտական պատգամ կը յղէ», նշեց իրանեան դիւանագիտութեան պետը:
«Հակառակորդ կողմերուն բանակցութիւններուն ընթացքին սադրիչ քայլեր կատարելը կրնայ կասկածներ յառաջացնել անոնց լրջութեան նկատմամբ», ըսաւ Արաղչի:
Յիշեցնենք, որ Միացեալ Նահանգներու նախագահ Տանըլտ Թրամփ յայտնած էր, թէ Իրանի հետ հարցերը լաւ կ՛ընթանան` նշելով, որ մօտ օրէն համաձայնութիւն պիտի գոյանայ:
Թրամփ ըսած էր, թէ Իրանի հետ լաւ յառաջընթաց գոյութիւն ունի, եւ գործարք պիտի կնքուի առանց ռումբերու օգտագործման կարիք ըլլալու: