Մայիսի 1-ի գիշերը ռուսական բանակը հարձակումներ է իրականացրել Ուկրաինայի շրջանների վրա։ Օդեսայի շրջանի ղեկավար Օլեգ Կիպերի խոսքով՝ քաղաքում անօդաչու թռչող սարքի հարվածի հետևանքով զոհվել է երկու մարդ, ևս հինգը վիրավորվել են։
«Վնասվել են բազմահարկ բնակելի շենքեր, մասնավոր տներ, սուպերմարկետ, դպրոց և մեքենաներ։ Որոշ տեղերում բռնկվել են հրդեհներ, որոնք մեր փրկարարները մարում են։ Հարձակման հետևանքով երկու մարդ զոհվել է, կա հինգ վիրավոր։ Բժիշկները տուժածներին ցուցաբերում են անհրաժեշտ օգնությունը», — տեղական ժամանակով ժամը 3:30-ի սահմաններում գրել է Կիպերը Telegram-ում։
Օդեսայում ռուսական օդային հարձակման հետևանքով տեղի ունեցած ավերածությունների մասին Telegram-ում գրել է նաև քաղաքապետ Գենադի Տրուխանովը։ «Օդեսայի տարբեր շրջաններում վնասվել են բնակելի շենքեր և քաղաքացիական ենթակառուցվածքներ։ Հրդեհներ են բռնկվել, և զոհերի մասին հաղորդագրություններ են ստացվում», — ասվում է նրա գիշերային հաղորդագրության մեջ։
Օդեսայի վրա հարձակման մասին հաղորդագրություններից մի քանի ժամ առաջ Խարկովի քաղաքապետ Իգոր Տերեխովը նույնպես գրել է անօդաչու թռչող սարքերի հարձակման մասին:
Ուկրաինայի ռազմաօդային ուժերը նաև հաղորդել են Կրոպիվնիցկի քաղաքի և երկրի արևելյան շրջանների՝ Սումիի, Պոլտավայի, Զապորոժիեի և Դոնեցկի մարզերի վրա Ռուսաստանի կողմից իրականացված հարձակումների մասին՝ առանց մանրամասներ հաղորդելու։