Միացեալ Նահանգներու արտաքին գործոց նախարար Մարքօ Ռուպիօ զգուշացուց. «Միացեալ Նահանգներ իրենց միջնորդութեան վերջ պիտի տան, եթէ Ռուսիան եւ Ուքրանիան տագնապին վերջ տալու շօշափելի առաջարկներ չներկայացնեն»:
Միացեալ Նահանգներու արտաքին գործոց նախարարութեան բանբեր Թամի Պրուս իր կարգին լրագրողներուն յայտնեց. «Մենք ներկայիս կը գտնուինք փուլի մը մէջ, որ կողմերէն կը պահանջէ այս տագնապին վերջ տալու առաջարկներ ներկայացնել: Եթէ յառաջընթաց չարձանագրուի, ետդարձ պիտի կատարենք այս հոլովոյթին մէջ միջնորդի մեր դերակատարութենէն»:
Միւս կողմէ, Պրուս անդրադառնալով Հնդկաստան-Փաքիստան վերջին լարուածութեան, նշեց. «Ռուպիօ իր հնդիկ եւ փաքիստանցի պաշտօնակիցները պիտի յորդորէ վիճելի Քաշմիր տարածքի հնդկական բաժինին մէջ արիւնալի յարձակումէն ետք կացութիւնը չբարդացնելու»:
«Ռուպիօ երեքշաբթի կամ չորեքշաթի օր պիտի խորհրդակցի իր հնդիկ ու փաքիստանցի պաշտօնակիցներուն հետ», ըսաւ ան:
Աւելի ուշ, ՄԱԿ-ի Ապահովութեան խորհուրդի նիստի ընթացքին ամերիկացի դիւանագէտ Ճոն Քելլի Ռուսիան մեղադրած է շարունակուող արիւնահեղութեան մէջ` յայտարարելով, որ այդ հարուածներուն պատճառով մեծաթիւ զոհեր եղած են, ներառեալ քաղաքայիններ:
«Ճիշդ հիմա Ռուսիան տեւական խաղաղութեան հասնելու հիանալի կարելիութիւն ունի», ըսած է Քելլի` աւելցնելով, որ պատերազմը դադրեցնելու բեռը Ռուսիոյ եւ Ուքրանիոյ ուսերուն վրայ է: