15:00 09.06.2025 (Թարմացված է: 15:06 09.06.2025)
Բաժանորդագրվել
Պատգամավորները պատրաստ են «Պատիվ ունեմ» խմբակցության գործընկերների հետ լրացուցիչ քննարկումներ անցկացնել իմպիչմենտ նախաձեռնելու գործընթացի շուրջ։
ԵՐԵՎԱՆ, 9 հունիսի – Sputnik․ «Հայաստան» խմբակցությունը վերահաստատում է պատրաստակամությունը՝ աջակցելու վարչապետի իմպիչմենտի գործընթացի նախաձեռնությանը։ Այս մասին հայտարարություն է տարածել խմբակցության անդամ Քրիստինե Վարդանյանը։
««Հայաստան» խմբակցությունը, հավատարիմ մնալով ավելի վաղ արված հայտարարությանը, վերահաստատում է իր պատրաստակամությունը՝ ապահովել պակասող 28 պատգամավորի ստորագրությունները ողջամիտ ժամկետներում՝ ԱԺ-ում իմպիչմենտի գործընթաց նախաձեռնելու համար»,- նշված է հայտարարության մեջ։
Վարդանյանի խոսքով՝ պատրաստ են հարցի շուրջ հավելյալ քննարկումներ ունենալ «Պատիվ ունեմ» խմբակցության հետ։
Հիշեցնենք` ընդդիմադիր ակտիվիստ, քաղաքական գործիչ Էդգար Ղազարյանն ու «Վետօ» շարժման անդամ Նարեկ Մալյանը ապրիլի 28-ին 107 նամակներ ուղարկեցին ԱԺ 107 պատգամավորներին՝ առաջարկելով խելամիտ ժամկետում վարչապետի իմպիչմենտ նախաձեռնելու գործընթաց սկսել։
ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանը հունիսի 7–ին հաղորդագրություն տարածեց, որ խմբակցությունը որոշել է անվստահություն հայտնել ՀՀ վարչապետ Նիկոլ Փաշինյանին և վարչապետի թեկնածու առաջադրել Մասիս համայնքի ղեկավար Դավիթ Համբարձումյանին։
Ավելի վաղ «Քաղաքացիական պայմանագրից» հեռացված Հովիկ Աղազարյանն ու Հակոբ Ասլանյանը վարչապետի թեկնածու էին առաջադրել «Լուսավոր Հայաստան» կուսակցության նախագահ Էդմոն Մարուքյանին: