Ամերիկյան համալսարանը մինչ այս պահը չի հրապարակել իր «Քաղաքացիական պայմանագիր» կուսակցության անդամ բազմաթիվ դասախոսներից գոնե մեկի անունը, քանի որ այդպիսիք պարզապես չկան։
Այս մասին սոցցանցի իր էջում գրել է պատգամավոր Թագուհի Ղազարյանը:
«Հրապարակային բանավիճելու իմ հրավերին Վահրամ Տեր-Մաթևոսյանը արձագանքել է 168.am կայքին էժանագին մի հոդված պատվիրելով։
Ըստ Սաթիկ Սեյրանյանի կայքի, ես`ՔՊ-ի գորշ կարդինալս, պլանավորված արշավ եմ սկսել Ամերիկյան համալսարանի դեմ։
Անշուշտ, այդ ես եմ սիվիկի պադվալում անձամբ գրել Սամվել Ֆարմանյանի անմակարդակ գրառումը, որպեսզի հանրային զայրույթ առաջացնեմ նրա դեմ։ Հետո էլ AI-ով գեներացրել եմ Ամերիկյան համալսարանի հայտարարությունը այն մասին, որ իրենց մոտ աշխատում են բազմաթիվ ՔՊ-ական դասախոսներ և համալսարանին դրել անհարմար իրավիճակում։ Իսկ սերժական բլոգերների խոսքը կոնտեքստից կտրված է, իրականում նրանք նկատի ունեին մի իրավիճակ, երբ իշխանափոխությունից հետո օրենսդրությունը կփոխեն։
Դոկտոր Տեր-Մաթևոսյան, դուրս եկեք 168 ժամի, Անտիֆեյքի ու մնացած սերժական մեդիաների թիկունքից, և Ձեր դեմքով ներկայացեք, ինչպես Ձեր դեմքով էիք ներկայանում, երբ ինձ բարեկամաբար խորհուրդ էիք տալիս ընտրել ակադեմիական և քաղաքական գործունեության միջև։
Հ. Գ. հիշեցնեմ, որ Ամերիկյան համալսարանը մինչ այս պահը չի հրապարակել իր «Քաղաքացիական պայմանագիր» կուսակցության անդամ բազմաթիվ դասախոսներից գոնե մեկի անունը, քանի որ այդպիսիք պարզապես չկան»,- ասվում է գրառման մեջ։