Իսրայելի վարչապետ Բենիամին Նեթանյահուն հայտարարել է, որ Իսրայելի պաշտպանության ուժերը կմնան Գազայի մեծ մասում՝ ԱՄՆ նախագահ Դոնալդ Թրամփի խաղաղության ծրագրի շրջանակներում։
Ըստ The Guardian-ի, նա այս հայտարարությունն արել է ԱՄՆ կատարած իր այցն ամփոփող տեսաուղերձում։
«Սա պատմական այց էր։ Մենք դերերը փոխեցինք և մեկուսացրինք Համասին։ Այժմ ամբողջ աշխարհը, այդ թվում՝ արաբական և մուսուլմանական աշխարհը, ճնշում է գործադրում Համասի վրա՝ ընդունելու նախագահ Թրամփի հետ մեր կողմից սահմանված պայմանները՝ բոլոր պատանդների ազատ արձակումը և զոհվածների մարմինների վերադարձը։ Մինչդեռ, Իսրայելի բանակը մնում է տարածքի մեծ մասում», – ասել է Նեթանյահուն։
Պաղեստինյան պետության ստեղծմանը Իսրայելի հնարավոր համաձայնության մասին հարցին վարչապետը պատասխանել է. «Բացարձակապես ոչ, և դա պայմանագրում նշված չէ։ Մենք կտրականապես դեմ ենք Պաղեստինյան պետության ստեղծմանը։ Նախագահ Թրամփը նույնպես խոսել է այս մասին. նա ասել է, որ հասկանում է մեր դիրքորոշումը։ Նման քայլը կլինի հսկայական պարգև ահաբեկչության համար և սպառնալիք Իսրայելի համար։ Եվ, իհարկե, մենք դա չենք անի»,-նշել է Նեթանյահուն: