Լիբանանի մէջ Եգիպտոսի դեսպան Ալլա Մուսա յայտնեց. «Խորհրդարանական ընտրութիւններու նիւթը Լիբանանի համար հիմնական հարց է, եւ մենք զանոնք իրենց ժամկէտին կատարելուն հետ ենք: Կը յուսանք, որ ընտրական օրէնքին վերաբերեալ լաւագոյն ընտրանքին շուրջ համաձայնութիւն մը գոյանայ»` աւելցնելով, որ ընտրութիւններուն յետաձգումը լաւ պատգամ մը պիտի չըլլայ:
Դեսպանը «Էլ.Պի.Սի.»-ի հետ հարցազրոյցի ընթացքին շեշտեց. «Լիբանանի կայունութիւնը մեզի համար հիմնական հարց է»:
«Արաբական եւ իսլամական շարք մը պետութիւններու Միացեալ Նահանգներու նախագահ Տանըլտ Թրամփի Կազայի վերաբերեալ ծրագիրը ողջունելը Համաս շարժումին վրայ կը դնէ ամերիկեան առաջարկը դրականօրէն ընկալելու պատասխանատուութիւն», ըսաւ Մուսա:
«Կը մաղթեմ, որ Համաս առաջարկը դրական կերպով ընկալէ», յայտնեց Եգիպտոսի դեսպանը` նշելով, որ իր երկիրը «ամէն ջանք պիտի թափէ Կազայի մէջ պատերազմը դադրեցնելու համար»:
Ան նշեց, որ Միացեալ Նահանգները, արաբական եւ իսլամական պետութիւնները համաձայնութեան երաշխաւոր կը նկատուին:
Անդրադառնալով Իրանի դիրքորոշումին` Մուսա ըսաւ. «Կը յուսանք, որ Կազայի մէջ պատերազմի աւարտով շրջանին մէջ լարուածութիւնը հանդարտի»` նշելով. «Իրան շրջանային ուժ մըն է, որ պէտք է նկատի առնուի, եւ Ամերիկայի ու Իրանի միջեւ երկխօսութիւնը պիտի նպաստէ հարցերու հանդարտեցման»:
«Եգիպտոս Իրանի եւ Ամերիկայի հետ ուղղակի կապ ունի, եւ մենք ճիշդ ուղղութեան վրայ ենք», նշեց Եգիպտոսի դեսպանը: