ԱՄՆ նախագահ Դոնալդ Թրամփը երեքշաբթի օրը ստորագրել է գործադիր հրամանագիր, որով դաշնային պաշտոնյաներին հրահանգվում է օգտագործել արհեստական բանականության (ԱԲ) տեխնոլոգիաները՝ Միացյալ Նահանգներում մանկական քաղցկեղի հետազոտությունները առաջ մղելու համար։
«Այս գործադիր հրամանագրով ես հանձնարարում եմ դաշնային կառավարությանը լիովին օգտագործել արհեստական բանականությունը՝ մանկական քաղցկեղի հետազոտությունները արագացնելու համար», – լրագրողներին ասել է նախագահը Սպիտակ տան Օվալաձև աշխատասենյակում փաստաթուղթը ստորագրելուց հետո։
«Մենք տարիներ շարունակ տեղեկատվություն ենք կուտակել մանկական քաղցկեղի մասին, բայց մինչ օրս չենք կարողացել լիովին օգտագործել այս տվյալները և կիրառել կլինիկական պրակտիկայում։
Օգտագործելով առաջադեմ արհեստական բանականություն՝ մենք կօգնենք գիտնականներին և հետազոտողներին հայտնաբերել բուժման և կանխարգելման նոր մեթոդներ», -ընդգծել է Թրամփը։
ԱՄՆ կառավարությունը լրացուցիչ 50 միլիոն դոլար է հատկացրել մանկական քաղցկեղի բուժման համար։