Oragir.News-ն օրեր առաջ անդրադարձել էր Հայաստանի ազգային պատկերասրահի սրահները կոմերցիոն վարձակալությամբ տրամադրելու հնարավորությանը՝ ներկայացնելով նաև պատկերասրահի աշխատակցի մեկնաբանությունները։
Մեր հրապարակումը մեծ հետաքրքրություն առաջացրեց ընթերցողների շրջանում․ մասնավորապես` հարց էր բարձրացվել, թե որքա՞ն արժե սրահների վարձակալությունը։ Հանրային քննարկումների կենտրոնում է նաև այն հարցը, թե պե՞տք է արդյոք ազգային մշակութային ժառանգության պահոցը վերածվի եկամտաբեր բիզնես տարածքի, թե՞ ոչ։
Oragir.News-ը գրավոր հարցմամբ հետևյալ հարցերն ուղղեց Պատկերասրահի ղեկավարությանը․
Ի պատասխան՝ մեզ հայտնեցին, որ սրահների օգտագործման և հարակից ծառայությունների տրամադրումը իրականացվում է պայմանագրային հիմունքներով՝ համաձայնեցված լիազոր պետական մարմնի հետ։ Ըստ պատասխանի՝ միջոցառումների արժեքը կախված է սրահից, միջոցառման ծավալից, տևողությունից, օրվա ժամից, ինչպես նաև պահանջվող հավելյալ ծառայություններից։ Միաժամանակ, պետական և հանրային կարևորության միջոցառումների դեպքում հնարավոր են զեղչեր։
Բացի այդ, մեզ տեղեկացրին, որ միջոցառումները պետք է լինեն մշակութային, ուսումնադաստիարակչական կամ գիտակրթական բնույթի և չհակասեն հաստատության կանոնադրությանը։
Սահմանված են նաև մի շարք արգելքներ․ մասնավորապես՝ հյուրասիրության ընթացքում արգելվում են տաք ուտեստների մատուցումը, Պատկերասրահի տարածքում ծխելը, մոմ կամ այլ նյութեր վառելը, ինչպես նաև ցուցանմուշների անվտանգությանը սպառնացող սարքավորումների տեղադրումը։
Oragir.News-ի հարցին, թե ի՞նչ գներով են սրահները տրամադրվում վարձակալության՝ Պատկերասրահից պատասխանեցին՝ ըստ պաշտոնական տեղեկատվության, սրահների օգտագործման թույլտվության մեկ օրվա արժեքը Պատկերասրահի աշխատանքային օրերին և ժամերին սկսվում է 250․000 դրամից։ Նշված գումարը չի ներառում անվտանգության, սպասարկման, տեխնիկական մուտքերից օգտվելու կամ հյուրասիրություն կազմակերպելու վճարները։
«Միջոցառումների պատշաճ և անվտանգ կազմակերպման նպատակով Պատկերասրահը մատուցում է արտասահմանյան թանգարաններում ընդունված չափանիշներին համապատասխան ծառայություններ»,- ասվում է պատասխանի մեջ։