Վարչապետ Նիկոլ Փաշինյանը ներկա է գտնվել Ներքին գործերի նախարարության Ոստիկանության գվարդիայի գործարկման արարողությանը, հայտնում են ՀՀ կառավարությունից։
Ըստ հաղորդագրության՝ Փաշինյանը Ներքին գործերի նախարար Արփինե Սարգսյանի ուղեկցությամբ ծանոթացել է Ոստիկանության գվարդիայի տեխնիկական միջոցներին, միջազգային ստանդարտներին համապատասխանող նոր սպառազինությանը:
«Այսօրվանից պատմության նոր էջ ենք բացում, և մեր ակնկալիքն է, որ Ոստիկանության գվարդիան լինի որակական նոր ծառայություն և՛ Հայաստանի, և՛ քաղաքացիների, և՛ հենց իրենց՝ ծառայողների համար»,- ասել է վարչապետը:
Նա նշել է, որ ոստիկանության և ՆԳՆ-ի բարեփոխումները երբեք ամբողջական չեն լինում։
«Այն պահին, երբ արձանագրենք, որ բարեփոխումն ավարտել ենք, նշանակում է՝ սկսել ենք հետընթաց։ Բարեփոխումն անընդհատ պրոցես է, և անհրաժեշտ է ժամանակ առ ժամանակ կանգ առնել, նայել, ամփոփել արվածը և պլանավորել, վերապլանավորել, վերանայել ռազմավարությունները»,- ասել է նա:
Վարչապետն ընդգծել է, որ Ներքին գործերի նախարարությունը, ոստիկանությունը և ամբողջ հանրապետությունը կանգնած են նոր մարտահրավերների և անսպասելի խնդիրների առջև, և որքան շատ են նման «նոր տեսարաններ» առաջանում, այնքան ավելի արագ է երկիրն առաջ շարժվում։
Ավելի վաղ Հայկ Բաբայանը նշանակվել էր ՆԳՆ ոստիկանության գվարդիայի հրամանատար։ Բաբայանը հոկտեմբերի 31-ին ազատվել էր ՀՀ ոստիկանության զորքերի հրամանատարի և ոստիկանության պետի տեղակալի պաշտոնից, որում նշանակվել էր 2020 թվականի նոյեմբերի 16-ին։ Մինչ այդ՝ 2012-2020 թվականներին, նա զբաղեցրել էր ՀՀ ոստիկանության զորքերի հրամանատարի՝ անձնակազմի հետ տարվող աշխատանքների գծով տեղակալի պաշտոնը։
