Ուկրաինայի եւ Վրաստանի հետ համաձայնագրերով ավելի շատ պաշտպանական աջակցություն է նախատեսվել, քան Հայաստանի հետ համաձայնագրով. ամերիկացի գնդապետը Aravot.am-ի հետ զրուցել է ՀՀ-ԱՄՆ ռազմավարական գործընկերության մասին
Այս մասին Aravot.am-ի հետ զրույցում նկատել է տվել Արտաքին քաղաքականության հետազոտման ինստիտուտի փորձագետ, ամերիկացի գնդապետ Ռոբերտ Հեմիլթոնը:
«Դրա (համաձայնագրի – Ա.Ա.) հիմնական օգտակարությունը կայանում է երկկողմ հարաբերություններում Միացյալ Նահանգների աճող հետաքրքրվածության հավաստմամբ, որը հավանական է կվերածվի Հայաստանին ֆինանսական ավելի մեծ աջակցությամբ, այդ թվում՝ անվտանգային բնագավռում», – մեկնաբանում է Ռոբերտ Հեմիլթոնը:
Ռոբերտ Հեմիլթոնը
Ըստ նախկին զինվորականի՝ «Համաձայնագիրը ամերիկյան եւ հայկական զինված ուժերի միջեւ համատեղ աշխատանքների զարգացման, ինչպես նաեւ Հայաստանի սահմանային անվտանգության, ռազմական վերապատրաստումների կենտրոնների եւ կիբերանվտանգության ոլորտներում ընդլայնված համագործակցության եւ աջակցության հնարավորություններ կստեղծի»:
Ուկրաինան եւ Վրաստանը ՆԱՏՕ-ի թեկնածուներ էին, Հայաստանը՝ ոչ
Aravot.am-ի դիտարկմանը, որ համաձայնագրին ավելի քննադատաբար մոտեցող քաղաքական գործիչներ եւ փորձագետներ փաստում են, որ ամերիկյան կողմը Ուկրաինայի եւ Վրաստանի հետ 2008-ին եւ 2009-ին նույնանման համաձայնագրերում ավելի մեծ հանձնառություններ է որդեգրել, գնդապետը պատասխանեց. «Տրամաբանական է, որ Ուկրաինայի եւ Վրաստանի հետ ռազմավարական գործընկերության համաձայնագրերը ավելի համապարփակ էին: Այս համաձայնագրերով ավելի շատ պաշտպանական աջակցություն է նախատեսվել, քան Հայաստանի հետ համաձայնագրով:
Այդ համաձայնագրերի ստորագրման ժամանակ Ուկրաինան եւ Վրաստանը ՆԱՏՕ-ին անդամակցելու թեկնածուներ էին: Ուկրաինան դեռեւս թեկնածու է: Ներկա իշխանությամբ Վրաստանը, գոնե դե ֆակտո առումով, թեկնածու չէ:
Քանի որ երկու երկրներն էլ ՆԱՏՕ-ի անդամ-թեկնածուներ էին, Միացյալ Նահանգներն ավելի մեծ հետաքրքրվածություն ուներ նրանց տարածքային պաշտպանական կարողությունների զարգացմամբ, որպեսզի նրանք անվտանգային բեռ չդառնային ՆԱՏՕ-ի համար, երբ կմիանային դաշինքին», – բացատրում է Հեմիլթոնը:
«Բայդենի վարչակազմը համաձայնագրի հարցում, վստահաբար, Թրամփի վարչակազմի հաստատումը կամ աջակցությունը ստանալ չի ակնկալել»
Հետաքրքրվեցինք նաեւ՝ արդարացվա՞ծ է տեսակետը, որ փաստաթղթի բովանդակությունը համաձայնեցվել է ԱՄՆ նոր՝ Թրամփ-Վենս վարչակազմի հետ՝ հաշվի առնելով, որ այն ստորագրվել է Բայդեն-Հարիս վարչակազմի կառավարման վերջին օրերին:
Գնդապետի խոսքով. «Մշուշոտ է մնում հարցը, թե Հայաստանի հետ ռազմավարական գործընկերության փաստաթուղթը որքանով է համաձայնեցվել Բայդենի եւ Թրամփի վարչակազմերի միջեւ:
Անկասկած, Թրամփի վարչակազմը տեղյակ է եղել, որ համաձայնագիր է մշակվում, եւ հավանական է, որ երկու վարչակազմերի ցածրադիր հատվածների միջեւ քննարկումներ ընթացել են իշխանության փոխանցման փուլում:
Սակայն Բայդենի վարչակազմը համաձայնագրի հարցում, վստահաբար, Թրամփի վարչակազմի հաստատումը կամ աջակցությունը ստանալ չի ակնկալել: Համաձայնագիրը մշակվում էր Միացյալ Նահանգների նախագահական ընտրությունից շատ ավելի վաղ», – եզրափակում է Արտաքին քաղաքականության հետազոտման ինստիտուտի փորձագետ Հեմիլթոնը:
Համատեքստ
Հիշեցնենք. 2025 թվականի հունվարի 14-ին Վաշինգտոնում՝ ԱՄՆ պետքարտուղարությունում ՀՀ ԱԳ նախարար Արարատ Միրզոյանն ու ԱՄՆ այն ժամանակվա պետքարտուղար Էնթոնի Բլինքնենը ստորագրեցին ՀՀ-ԱՄՆ ռազմավարական գործընկերության հանձնաժողովի մասին կանոնադրությունը:
Միջոցառման ժամանակ նախարար Միրզոյանը հայտարարել էր. «Մենք ցանկանում ենք շարունակել համագործակցությունն ԱՄՆ նոր վարչակազմի հետ՝ մեր Ռազմավարական գործընկերության կանոնադրության մեջ նշված հավակնոտ նպատակներն իրագործելու ուղղությամբ»:
Արսեն ԱՅՎԱԶՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: