Լիբանանի Հանրապետութեան նախագահ Ժոզեֆ Աուն «Սքայ Նիուզ Արապիա» պատկերասփիւռի կայանին հետ հարցազրոյցի ընթացքին յայտնեց, որ պետութիւնը մէկ մարմին է, որ բաղկացած է հանրապետութեան նախագահէն, կառավարութենէն եւ խորհրդարանէն` շեշտելով, որ վարչապետին ու խորհրդարանի նախագահին հետ տարակարծութիւնները անձնական չեն, այլ ի շահ հայրենիքին:
Նախագահը նշեց, որ լիբանանցի ժողովուրդը յոգնեցաւ պատերազմներէն եւ չ՛ուզեր մագլցողական հռետորաբանութիւն լսել` կառչածութիւն յայտնելով տագնապներու լուծման համար դիւանագիտական ընտրանքին եւ փոխհասկացողութեան հռետորաբանութեան կիրարկման` փոխան տարբեր խնդիրներու լուծման համար պատերազմի հռետորաբանութեան:
Ան ըսաւ, որ խորհրդարանի նախագահ Նեպիհ Պըրրիի հետ Հըզպալլայի զէնքի հարցին շուրջ համաձայնութիւն գոյութիւն ունի` աւելցնելով, որ զէնքի մենաշնորհի որոշումը տրուեցաւ, եւ միայն գետնի վրայ անոր գործադրութիւնը կը մնայ:
Աուն ըսաւ, որ բարեկարգումը լիբանանեան ներքին պահանջ կը նկատուի, նախքան արտաքին պահանջ մը ըլլալը` յայտարարելով, որ կառավարութիւնը ելեկտրոնային կառավարման որդեգրման ճամբով փտածութեան դէմ պայքարի գործնական ծրագիրներ ունի:
Հանրապետութեան նախագահը հերքեց այն լուրը, թէ Հըզպալլան մերժած է, որ լիբանանեան բանակը Հարաւային արուարձաններուն մէջ խուզարկութեան համար դիրք մը մուտք գործէ` շեշտելով, որ այդ տեղեկութիւնը ճիշդ չէ:
Աուն նշեց, որ Միջազգային դրամատունը վերաշինութեան գինը շուրջ 14 միլիառ տոլար գնահատած է:
Նախագահը յայտնեց, որ առաջնահերթութիւնը ծանր եւ միջին զէնքերու յանձնումն է, իսկ թեթեւ զէնքերը լիբանանեան հասարակութեան մշակոյթին մաս կը կազմեն:
Աուն ընդգծեց, որ լիբանանեան բանակը իր պարտաւորութիւնները առանց ընդդիմութեան կամ խնդիրներու կը կատարէ: