Զինադադարի հսկողութեան հնգանդամ յանձնախումբի նախագահ, ամերիկացի զօրավար Ճասփըր Ճեֆըրզ հանրապետութեան նախագահ զօր. Ժոզեֆ Աունին ներկայացուց յանձնախումբի նոր նախագահ, ամերիկացի զօրավար Մայքըլ Լինին: Հանդիպումին ներկայ էր Լիբանանի մէջ Միացեալ Նահանգներու դեսպան Լայզա Ճոնսըն:
Նախագահ Աուն շեշտեց. «Անհրաժեշտ է հսկողութեան յանձնախումբի աշխատանքը կեանքի կոչել եւ շարունակել Իսրայէլի վրայ ճնշումը, որպէսզի դադրեցնէ իր յարձակումները, հեռանայ իր բռնագրաւած հինգ բլուրներէն եւ լիբանանցի գերիները վերադարձնէ»:
«Լիբանանեան բանակը հարաւի մէջ, մասնաւորաբար Լիթանիէն հարաւ գտնուող շրջանին մէջ իր առաքելութիւնը կը կատարէ ամբողջական կերպով, ուր կը շարունակէ զէնքի եւ զինամթերքի գրաւման գործողութիւնն ու զինեալ երեւոյթներու վերացումը», աւելցուց նախագահը: