Ստորագրած առաջին հրամաններից մեկով ԱՄՆ նորընտիր նախագահ Դոնալդ Թրամփը Ներքին գործերի նախարարին հանձնարարել է 30 օրվա ընթացքում անվանափոխել Մեքսիկական ծոցն ու Հյուսիսային Ամերիկայի ամենաբարձր լեռը՝ Դենալին։ Google-ի ներկայացուցիչները հայտնել են, որ պատրաստ են փոխել տեղանունները քարտեզներում, բայց միայն պաշտոնական անվանափոխությունից հետո։
Այս նյութը կարդալուն զուգահեռ կարող եք որևէ տեղանուն ավելացնել Google Maps-ում կամ փոխել արդեն գոյություն ունեցող անունը։ Օրինակ, եթե քարտեզում գտնեք Երևանի կենտրոնական փողոցներից Ալեք Մանուկյանը, ապա բացված վահանակում սեղմեք «առաջարկել խմբագրում» կոճակը և հիմնավորեք նոր անունը, օրինակ նշեք, որ փողոցը վերանվանվել է, Կալիֆորնիայից Google-ի աշխատակիցներն ի գիտություն կընդունեն ձեր առաջարկը, իսկ եթե ձեզ հետ այս գործողությունն անի ևս մի քանի տասնյակ օգտատեր, նոր անվան շանսերն ավելի մեծ կլինեն։
Google Maps-ը սկզբում արբանյակային նկարների բազա էր, հետո ավելացան աշխարհագրատեղեկատվական GPS տվյալները։ Տեղեկատվական համակարգը թեև 100 տոկոսանոց ճշգրտություն չունի, բայց մյուս վեբքարտեզների համեմատությամբ համարվում է ամենահավաստին։
Մեքսիկական ծոցում նավարկողները շուտով ծանուցում կստանան, որ արդեն լողում են «Ամերիկայի ծոց»-ում։ ԱՄՆ-ի վերընտրված նախագահը մեկ լեռ ու մեկ ծոց է վերանվանել, իր խոսքով, հանուն Ամերիկայի։ Հունվարի 20-ին՝ երդմնակալության ժամանակ, Դոնալդ Թրամփը հայտարարեց՝ վերադարձնում է Հյուսիսային Ամերիկայի ամենաբարձր լեռն ու ի պատիվ Միացյալ Նահանգների 25-րդ նախագահ Ուիլյամ Մաք Քինլիի, վերանվանում Մաք-Քինլի։ Մեքսիկական ծոցը վերանվանելու անհրաժեշտությունը հիմնավորելու համար փաստաթղթում նշվում է, որ այն ամենամեծն է աշխարհում և շարունակում է առանցքային դեր խաղալ ԱՄՆ-ի տնտեսական կյանքում։
Իր հրամանում Թրամփը շեշտում է, որ նոր անվանման միջոցով հարգում է այս կարևոր տնտեսական ռեսուրսը և դրա կարևորությունը Միացյալ Նահանգների տնտեսության համար: Google-ի ներկայացուցիչները X-ում գրեցին՝ պատրաստ են փոխելու տեղանունները, երբ դրանք պաշտոնապես կներառվեն պետական աղբյուրներում․
«Երբ դա տեղի ունենա, մենք արագ կթարմացնենք Google Քարտեզները ԱՄՆ-ում՝ ներառելով ՄաքՔինլի լեռը և Ամերիկայի ծոցը»։
New York Times-ը փոխանցում է, որ նախ կվերանվանվի ծովածոցը, միաժամանակ հայտնում, որ Մեքսիկայի օգտատերերը քարտեզների վրա կտեսնեն ծովածոցի նախկին, այսինքն՝ իրենց երկրում ընդունված անվանումը․
«Երբ տարբեր երկրներում պաշտոնական անունները տարբերվում են, Google Maps-ի օգտատերերը տեսնում են տեղական պաշտոնական անվանումը: Աշխարհի մյուս բոլոր օգտատերերը տեսնում են երկու անուններն էլ»։
Մեքսիկայի նախագահը հունվարի սկզբին Դոնալդ Թրամփի առաջին հայտարարություններից հետո առաջարկեց Հյուսիսային Ամերիկան վերանվանել «Մեքսիկական Ամերիկա», քանի որ այդպես էր կոչվում մինչև 1814 թվականի այն հիմնադիր փաստաթուղթը, որով ընդունվեց Մեքսիկայի Սահմանադրությունը։ Այս առաջարկը սակայն ոչ Թրամփը, ոչ էլ Google-ը չընդունեցին։
Google քարտեզներն առաջին անգամ չեն խմբագրվում քաղաքական, ռազմական կամ այլ պատճառներով։ 2014 թվականին օրինակ, Ղրիմի՝ Ռուսաստանին բռնակցվելուց վեց շաբաթ անց, Google Maps-ը Ղրիմն իբրև Ռուսաստանի տարածք ցուցադրեց Ռուսաստանի Դաշնության օգտատերերի համար, միևնույն ժամանակ, ուկրաինացի օգտատերերի համար թերակղզին շարունակում էր ցուցադրվել որպես Ուկրաինայի տարածք։ Այլ երկրների օգտատերերին սահմանը ցույց տալու համար օգտագործվել է կետավոր մոխրագույն գիծ, ինչը նշանակում է ժամանակավոր կամ վիճելի սահմաններ։
Սրան հակառակ՝ ուկրաինական Խերսոնի, Դոնեցկի և Լուգանսկի շրջանները, թեև անցել են ռուսական ԶՈՒ-երի տիրապետության տակ, դեռևս ցուցադրվում են իբրև Ուկրաինայի մաս նաև Ռուսաստանում գտնվող օգտատերերի համար: Google-ը մի դեպքում հիմնվում է բացառապես պաշտոնական տվյալների, մյուս դեպքում «ընդառաջում» երկրագնդի մյուս ծայրում գտնվող օգտատիրոջն ու արագ փոխում տեղանունները, բայց նաև պատրաստակամություն հայտնում՝ «հնարավոր սխալների դեպքում արագ ուղղել դրանք»։