«Քո չստացված մանկությունը մեր վրա մի բարդիր», «Քանի՞ արծաթով ծախեցիր մեր զավակների հայրենիքը», «Իմ երեխայի խաղալիքը մնաց Մարտակերտում», «Վերադարձրու արցախցի երեխաների մանկությունը». այս և այլ պաստառներով հունիսի 1-ին` Երեխաների պաշտպանության օրվա կապակցությամբ, ՀՅԴ երիտասարդները ակցիա են անցկացրել ՀՀ վարչապետ Նիկոլ Փաշինյանի կառավարական ամառանոցի մոտ։
Ակցիայի նպատակն է հիշեցնել երեխաների հանդեպ ունեցած պետության պարտքը։
«Հունիսի 1-ը Հայաստանում տոն չէ։ Սա հիշեցում է, թե որքան անպաշտպան են մեր երեխաները, և որքան անկարող է պետությունը պաշտպանելու նրանց։ Մեր երեխաները խաղալու փոխարեն վախով են մեծացել, նրանց մանկությունը խեղվել է… Ով չկարողացավ պաշտպանել մեր երեխաներին, պետք է հեռանա»,- հայտարարել է ակցիայի մասնակիցներից մեկը։