Իսպանիայում 46 աստիճան ռեկորդային շոգ է գրանցվել

Հարավային Եվրոպան պատել է այրող շոգի ալիք, Իսպանիայում ջերմաստիճանը հասել է 46 աստիճանի ըստ Ցելսիուսի (114.8 աստիճան Ֆարենհայտ), իսկ մայրցամաքային Ֆրանսիայի մեծ մասում շոգի մասին նախազգուշացում է հայտարարվել, գրում է The Guardian-ը։
Հանածո վառելիքի աղտոտվածության հետևանքով առաջացած ծայրահեղ շոգն օրեր շարունակ մոլեգնել է Պորտուգալիայում, Իսպանիայում, Ֆրանսիայում, Իտալիայում և Հունաստանում, քանի որ Հարավային Եվրոպան վերապրում է ամռան առաջին շոգի ալիքը։
Բարձր ջերմաստիճանը մի շարք երկրների իշխանություններին ստիպել է հրապարակել նոր առողջապահական նախազգուշացումներ և հրշեջներին կոչ անել՝ անտառային հրդեհների բռնկումը կանխելու համար։
Թուրքիայում անտառային հրդեհների պատճառով իրենց տներից տարհանվել է ավելի քան 50 հազար մարդ, հայտնել են Ներքին գործերի նախարարության աղետների և արտակարգ իրավիճակների կառավարման վարչությունից։
Իսպանիայի հարավային քաղաքում կանխատեսվում է ավելի քան 40 աստիճան տաքություն առաջիկա երեք օրերի ընթացքում, իսկ գիշերային ժամերին մինչև հինգշաբթի առավոտ ջերմաստիճանը կկազմի առնվազն 25 աստիճան։
Բժիշկները մտահոգություն են հայտնել, որ շոգ օրերի և անհարմարավետ տաք գիշերների համադրությունը կարող է մահացու սթրեսի ենթարկել մարդու օրգանիզմը։
Իտալիայում, որտեղ կիրակի 27 քաղաքներից 21-ում գրանցվել է ամենաբարձր ջերմաստիճանը, ամենատաք շրջաններում, ինչպիսին է Տոսկանան, հոսպիտալացումների թիվը աճել է 20%-ով։ Մարդկանց խորհուրդ է տրվում ժամը 11:00-ից մինչև 18:00-ը տնից դուրս չգալ։
Ֆրանսիայի պատմության մեջ առաջին անգամ շոգի մասին նախազգուշացումները տարածվել են երկրի գրեթե ամբողջ մայրցամաքային մասի վրա։
Ֆրանսիայի օդերևութաբանական ծառայությունը շոգին առնչվող երկրորդ ամենաբարձր՝ «նարնջագույն» տագնապի մակարդակ է հայտարարել վարչական շրջանների 88%-ում։