Ընկերվար յառաջդիմական կուսակցութիւնը հաղորդագրութիւն մը հրապարակելով յայտարարեց. «Ընտրական օրէնքը փոխելու կարիքը պէտք է լիբանանցիներուն ձգտումները բաւարարելու եւ ներկայացուցչութիւնը բարելաւելու համար ըլլայ»:
«Տեսած ենք որոշ դիրքորոշումներ, որոնք կոչ կ՛ուղղեն` երեսփոխանական ընտրութիւններու օրէնքի փոփոխութիւնը կապելու շրջանին մէջ խաղաղութեան հոլովոյթի խօսակցութիւններուն, որոնք, ըստ այդ դիրքորոշումներուն, շիի երեսփոխանական ներկայացուցչութեան իրողութեան փոփոխութիւն կը պահանջեն», նշեց կուսակցութիւնը:
«Ընկերվար յառաջդիմական կուսակցութիւնը, որ հիմնական համայնքի մը ներքին թիրախաւորման կէտեր պարունակելուն համար կը մերժէ այդպիսի թեզերը, կը զգուշացնէ այդ առաջարկներուն վտանգաւորութենէն եւ Լիբանանի վրայ անոնց հետեւանքներէն` ընդգծելով, որ ընտրական օրէնքի փոփոխութեան կարիքը պէտք է լիբանանցիներու ձգտումները բաւարարելու եւ ներկայացուցչութիւնը բարելաւելու համար ըլլայ եւ ոչ թէ առնչուած ըլլայ քաղաքական փոփոխութիւններու կամ լիբանանեան որեւէ բաղադրիչի թիրախաւորման հետ», աւելցուց կուսակցութիւնը:
«Նախկին օրէնքներուն եւ ներկայ օրէնքին մեծագոյն վատ կողմերէն մէկը այն է, որ անոնք կը մշակուէին հաւասարակշռութիւնները փոխելու, կարգ մը ուժեր պաշարման ենթարկելու կամ ուրիշներ թիրախաւորելու համար: Հաստատօրէն այդ փորձերը որեւէ արդարացումով պէտք չէ կրկնել, որովհետեւ անոնք միայն քաղաքական ճգնաժամեր յառաջացուցին», նշեց Ընկերվար յառաջդիմական կուսակցութիւնը: