Իսրայէլի վարչապետ Պենիամին Նեթանիահու երկուշաբթի գիշեր Սպիտակ տունէն հեռաձայնելով Քաթարի վարչապետ, արտաքին գործոց նախարար Մոհամետ պըն Ապտելռահմանէն ներում հայցեց Տոհայի մէջ Համաս շարժումի ղեկավարութիւնը թիրախաւորած օդային յարձակումին համար: «Արապիա» արբանեակային պատկերասփիւռի կայանը հաղորդեց, որ այս մասին յայտնած է դիւանագէտ մը:
Դիւանագէտը ըսած է, որ Նեթանիահու ցաւ յայտնած է Քաթարի գերիշխանութեան ոտնահարման եւ քաթարցի իրաւապահի մը սպանութեան համար:
Յիշեցնենք, որ Իսրայէլ 9 սեպտեմբերին յարձակում գործած էր Քաթարի մայրաքաղաք Տոհայի մէջ բնակուած թաղի մը վրայ, ուր Համասի ղեկավարները հաւաքուած էին քննարկելու համար Կազայի մէջ զինադադարի հաստատման ամերիկեան առաջարկ մը: