Իսրայէլի արտաքին գործոց նախարար Կիտէոն Սահեր յայտնեց, որ հանդիպում ունեցած է Լիբանանի մէջ ՄԱԿ-ի ընդհանուր քարտուղարի յատուկ ներկայացուցիչ Ժենին-Հենես Պլասխարթի հետ:
«Հըզպալլան կը շարունակէ Իրանի աջակցութեամբ աշխուժացնել վերաշինութեան ու վերազինման իր ջանքերը, եւ ատիկա Իսրայէլի անվտանգութեան համար վտանգ է, ճիշդ ինչպէս նաեւ վտանգ է Լիբանանի ապագային համար», նշեց Իսրայէլի արտաքին գործոց նախարարը:
«Իսրայէլ այս ուղղուածութեան դիմաց իր գլուխը հողին մէջ չի կրնար պահել», աւելցուց Սահեր:
Իսրայէլեան դիւանագիտութեան պետը նաեւ նշեց, որ Պլասխարթի հետ հանդիպումի ընթացքին «վերահաստատեցի Միջին Արեւելքի մէջ յարաբերութիւններու բնականոնացման եւ խաղաղութեան ծիրը ընդլայնելու մեր կամքը»: