Արդարադատութեան նախարար Ատել Նասսար յայտնեց. «Լիբանանեան բանակը դէմ պիտի դնէ հարաւային Լիբանանի մէջ որեւէ ներթափանցման` գործադրելով հանրապետութեան նախագահ Ժոզեֆ Աունի թելադրանքները»: Ան այս մասին յայտնեց «Ժազիրա» արբանեակային պատկերասփիւռի կայանին հետ զրոյցի ընթացքին:
«Լիբանանեան դիւանագիտութիւնը պիտի համալրէ իսրայէլեան որեւէ յարձակումի դիմակայման բանակին դերը», նշեց նախարարը:
«Լիբանանեան պետութիւնը իր գերիշխանութիւնը պիտի տարածէ իր բոլոր հողերուն վրայ եւ զէնքը լիբանանեան բանակին մենաշնորհը պիտի դարձնէ», ըսաւ ան:
«Պատերազմը Լիբանանի եւ ամբողջ շրջանին համար աղէտալի ընտրանք է», շեշտեց Նասսար:
Յիշեցնենք, որ հանրապետութեան նախագահ Ժոզեֆ Աուն հինգշաբթի օր Պաապտայի պալատին մէջ լիբանանեան բանակի հրամանատար զօր. Ռուտոլֆ Հայքալի հետ իր հանդիպումին ընթացքին պահանջեց, որ բանակը դէմ դնէ հարաւային Լիբանանի մէջ իսրայէլեան որեւէ ներթափանցումի: